Il-Ministeru għall-Intern, is-Sigurtà, ir-Riformi u l-Ugwaljanza japprezza d-diversità u jagħraf li kull forma ta’ diskriminazzjoni hija ta’ detriment għas-soċjetà Maltija. Għaldaqstant, id-dipartimenti u l-entitajiet kollha fi ħdan il-Ministeru huma impenjati għall-apprezzament tad-diversità u l-ġlieda kontra d-diskriminazzjoni u l-esklużjoni li tirriżulta minn prattiċi diskriminatorji.
Il-Ministeru huwa impenjat fil-ġlieda kontra r-razziżmu u forom oħra ta’ diskriminazzjoni f’konformità mad-dmirijiet tiegħu tal-infurzar tal-liġi, filwaqt li d-dipartimenti u l-aġenziji l-oħra kollha li jiffurmaw parti mill-Ministeru għandhom l-għan li jipprovdu servizzi u assistenza lill-klijenti kollha b’mod ġust u ekwu, skont il-leġislazzjoni rilevanti.
Il-Ministeru jeħtieġ sforz biex l-entitajiet, id-dipartimenti, kif ukoll l-impjegati tiegħu:
1 – jippromwovu klima ta’ inklussività u rispett reċiproku;
2 – iqisu l-vulnerabbiltajiet u l-ħtiġijiet kulturali tal-klijenti; u,
3 – jindirizzaw kwalunkwe kwistjoni sistemika li tista’ teskludi individwi mill-proċess tat-teħid ta’ deċiżjonijiet u opportunitajiet għal tmexxija u avvanz professjonali minħabba razza, reliġjon, kultura, orjentazzjoni sesswali jew karatteristiċi oħra.
Klima ta’ inklussività mhux biss tiġi promossa b’miżuri diretti kontra r-razziżmu u d-diskriminazzjoni, iżda wkoll permezz tal-faċilitazzjoni ta’ miżuri orjentati lejn l-integrazzjoni, inkluż permezz ta’ riferiment għal entitajiet li jipprovdu servizzi speċjalizzati. Miżuri pożittivi bħal dawn jittieħdu, b’mod partikolari, minn entitajiet li jassumu responsabbiltà fit-tul lejn l-immigranti bil-ħsieb li jagħtu s-setgħa lill-individwi kkonċernati.
Il-ġlieda kontra r-razziżmu u d-diskriminazzjoni teħtieġ ukoll li l-entitajiet ikkonċernati jqisu l-vulnerabbiltajiet u l-ħtiġijiet kulturali tal-klijenti. Fil-kuntest tal-proċedura tad-determinazzjoni tal-ażil dan huwa prerekwiżit għal smigħ ġust u determinazzjoni tal-każijiet. Approċċ bħal dan huwa meħtieġ ukoll fl-isfera ta’ akkoljenza tal-immigrazzjoni, peress li s-servizzi pprovduti għandhom ikunu adattati għall-ħtiġijiet tal-individwu.
Għaldaqstant, il-Ministeru għall-Intern, is-Sigurtà, ir-Riformi u l-Ugwaljanza jindirizza r-razziżmu u d-diskriminazzjoni mhux biss permezz ta’ infurzar, iżda wkoll permezz ta’ miżuri pożittivi biex jagħtu s-setgħa lill-individwi kkonċernati. Aħna nqisu li dan huwa essenzjali għall-qerda tar-razziżmu u d-diskriminazzjoni fis-soċjetà tagħna.
Filwaqt li l-Ministeru u l-entitajiet tiegħu huma impenjati għad-diversità u n-nondiskriminazzjoni, l-uffiċjali tagħhom huma mitluba jħarsu u jirrispettaw il-prinċipji tad-dmir u r-responsabbiltà lejn il-klijenti tagħhom. Fuq il-post tax-xogħol, dawn il-prinċipji għandhom jieħdu preċedenza fuq it-twemmin personali, partikolarment fejn jidħlu kwistjonijiet li jinvolvu s-sigurtà u l-benessri.